चितवन । नेपाल अण्डा उत्पादक संघको केन्द्रिय अध्यक्ष पदको लागि २ जनाले उम्मेदवारी दिएका छन ।
अध्यक्ष पदको लागि शिवराम के सी र रघुनाथ भट्टले उम्मेदवारी दिएका हुन् । सहमतिको माध्यमबाट नेतृत्व चयन गर्ने हिजो देखिको प्रयास असफल भएपछि नेतृत्व चयनको लागि निर्वाचन हुने भएको हो । आज बिहानसम्म पटक पटक सहमतिको प्रयास गरेता पनि सफल नभएपछि निर्वाचन हुने निश्चित् भएको हो ।
के.सी. र भट्ट दुवै बलिया दावेदार हुन् । के.सी. संघको निवर्तमान अध्यक्ष हुन् भने भट्ट संघको उपाध्यक्ष हुन् । जेठ २४ गते सौराहामा भएको साधारणसभामा संघको अध्यक्ष त्रिलोचन कंडेल प्रति किसानहरुले तिव्र असन्तुष्टि जनाउदै अविश्वासको प्रस्ताव राखेको र कंडेल स्वयंमले उक्त कार्यक्रममा राजिनामाको घोषणा गरेपछि किसानहरुले शिवराम केसीलाई संघको अध्यक्ष भएको घोषणा गरेका थिए ।
उक्त घोषणा विधि सम्वत नभएको र दुवैजनाले आफू अध्यक्ष भएको दावी गर्दा अन्योलता भएको भन्दै जिल्ला प्रशासन कार्यालय चितवनको पहलमा औपचारिक रुपमा विशेष अधिवेशन गरेर नेतृत्व चयन गर्न लागिएको हो ।
आज रत्ननगरको होटल स्टार बेन्कुटमा शुरु हुन लागेको १५ औँ साधारणसाभा तथा बिशेष अधिवेसनमा १ जना अध्यक्ष र ६ जना सदस्य चयन हुने छन् । संघका ६ सय ९७ सदस्यले निर्वाचनमा मतदान गर्ने निर्वाचन ब्यबस्थापन समितिका संयाेजक भेषराज दुवाडीले जानकारी दिए ।
