काठमाडौँ- प्रमुख प्रतिपक्षी दल नेपाली कांग्रेसले सिन्धुपाल्चोकमा आइतबार बिहान बस दुर्घटना हुँदा १४ जनाको मृत्यु र १८ जना गम्भीर घाइते भएको घटनाप्रति दुःख व्यक्त गरेको छ ।

कांग्रेस केन्द्रीय कार्यसमितिको बैठकले दुर्घटनामा परी निधन भएकाप्रति श्रद्धाञ्जली अर्पण गर्दै शोक सन्तप्त परिवारजनमा समवेदना प्रकट गरेको छ ।
बैठकले दुर्घटनाका घाइतेको शीघ्र स्वास्थ्यलाभको कामना गर्दै उनीहरुको उचित उपचारको प्रबन्ध गर्न सरकारसँग माग गरेको कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।

गत कात्तिक र यही मंसिरमा बाग्लुङ, सुनसरी, अर्घाखाँची, सिन्धुपाल्चोकलगायत जिल्लामा भएका सडक दुर्घटनामा परी पाँच दर्जनभन्दा बढी व्यक्तिको निधन भएको साथै सडक दुर्घटनामा देशव्यापीरुपमा मृत्युको तथ्यांक बढेको भन्दै कांग्रेसले चिन्ता व्यक्त गरेको छ । यस्तो अवस्थामा सडक यात्रामा नागरिक जीवनको रक्षा गर्नुपर्ने सरकार कहाँ छ भन्ने प्रश्न उब्जिएको बैठकले उल्लेख गरेको छ ।

कांग्रेसले विज्ञप्तिमार्फत बाँकेको कोहलपुरमा विद्यालय प्रवेशद्वार अघिल्तिरै बालिकालाई ट्रकले कुल्चनु र घटनामा प्रहरीले संयमता नराख्दा थप द्वन्द्व सिर्जना हुनु दुःखद् भएको जनाउँदै घाइते बालिकाको सम्पूर्ण उपचार गर्न सरकारसमक्ष माग गरेको छ ।

कांग्रेसले केन्द्रीय समिति बैठकपछि विज्ञप्ति जारी गरी सडक दुर्घटना नियन्त्रण गर्न सरकार असफल भएको ठहर गर्दै दुर्घटनाको मुकदर्शक नभएर दुर्घटना नियन्त्रणका लागि गम्भीर पहलकदमी लिन सरकारलाई अपिलसमेत गरेको छ ।

बैठकले यही मंसिर २७ गते राति धनुषाको क्षिरेश्वरनाथ नगरपालिका–५ स्थित महेन्द्रनगरमा बम विष्फोटमा परी प्रहरी निरीक्षक अमिर दाहाल र अन्य दुई जना नागरिकको मृत्यु भएको घटनाप्रति दुःख व्यक्त गरेको छ ।

घटनाको भत्र्सना गर्दै काँग्रेसले बम विष्फोट गराउने दोषी जो भए पनि कानूनी दायरामा ल्याउने कर्तव्य निर्वाह गर्न नसक्नु र शान्तिसुरक्षा कायम गर्न निरन्तर सरकार असफल हुँदै गएको भन्दै चिन्ता प्रकट गरेको छ ।

सरकारलाई यस्ता घटनाप्रति गम्भीर हुन अपिल गर्दै कांग्रेसले घटनाको उच्चस्तरीय छानबिनको माग र बम विष्फोटमा परी घाइते भएकाको सम्पूर्ण उपचार गर्न तथा मृतकका परिवारलाई राहतको व्यवस्था गर्न सरकारसँग आग्रह गरेको छ ।

यसैगरी, बैठकले कञ्चनपुरको महाकाली नगरपालिकामा जंगली हात्तीको आक्रमणबाट वसन्ती भट्ट र भुरी बोहराको मृत्यु भएको तथा चार जना महिला घाइते भएको घटनाप्रति दुःख व्यक्त गर्दै मृतकको आत्माको चीर शान्तिको कामना र घाइतेको शीघ्र स्वास्थ्य लाभको कामना गरेको छ ।

बैठकले मृतकका परिवारलाई राहत उपलब्ध गराउन र घाइतेको निःशुल्क उपचारको व्यवस्था गर्न सरकारसँग माग गरेको छ ।

सभापति शेरबहादुर देउवाको सभापतित्वमा बसेको बैठकमा उपसभापतिद्वय विमलेन्द्र निधि र विजयकुमार गच्छदार एवं केन्द्रीय सदस्यद्वय बालकृष्ण खाँण र रमेश लेखकले आफ्नो धारणा राखेका थिए ।

केन्द्रीय कार्यसमितिको अर्को बैठक सोमबार दिउँसो १ बजे पुनःबस्ने मुख्य सचिव पौडेलले जानकारी दिए ।

तपाईको प्रतिक्रिया