चितवन- पूर्व-पश्चिम राजमार्गअन्तर्गत चितवनको राप्ती नगरपालिका १ स्थित लोथरमा दुई ट्रक एकआपसमा ठक्कर खाँदा दुवै ट्रकका चालकसहित चार जना गम्भीर घाइते भएकोमा एक चालकको उपचारका क्रममा पुरानो मेडिकल कलेजमा मृत्यु भएको छ ।
सोमबार बिहान ७:३० बजेको समयमा पूर्वबाट पश्चिमतर्फ आइरहेको ना ५ ख ८७४३ नम्बरको ट्रक र विपरीत दिशाबाट आएको ना ६ ख ७९६७ नम्बरको ट्रक ठोक्किएर दुर्घटना भएको इलाका प्रहरी कार्यालय भण्डाराले जनाएको छ ।
दुर्घटनामा गम्भीर घाइते भएका ना ६ ख ७९६७ नम्बरका ट्रक चालक झापा कंकाई नगरपालिका वडा नं १ निवासी ४० वर्षीय अर्जुन जोगीको उपचारका क्रममा बिहान ८:२५ बजे पुरानो मेडिकल कलेजमा मृत्यु भएको हो ।
सोही ट्रकका सहचालक मोरङका २० वर्षीय प्रज्वल ब्रदेवानको पुरानो मेडिकल कलेजमा उपचार भइरहेको छ । उनको अवस्था मध्यम रहेको प्रहरीले जनाएको छ ।
यस्तै, ना ५ ख ८७४३ नम्बरको ट्रक चालक मकवानपुरको हेटौँडा उपमहानगर १४ का २६ वर्षीय वीरबहादुर लोप्चन र सोही ट्रकका सहचालक मकवानपुरको वागमती गाउँपालिका वडा नं १ का २० वर्षीय सोमबहादुर तामाङको सोही अस्पतालमा उपचार भइरहेको प्रहरीले जनाएको छ । उनीहरुको अवस्था मध्यम रहेको प्रहरीले जनाएको छ ।
