काठमाडौँ- एक वर्षअघि तत्कालीन पर्यटनमन्त्री रवीन्द्र अधिकारीसहित ७ जनाको ज्यान जाने गरी ताप्लेजुङ पाथिभरामा भएको हेलिकप्टर दुर्घटनामा पाइलट अति उत्साहित भएका कारण हुनसक्ने छानविन आयोगले जनाएको छ ।
‘प्रतिकूल मौसमबीच पाथिभराको हेलिप्याडबाट उडान गर्नासाथ पाइलट अति उत्साहित अवस्थाबाट प्रभावित भएको हुनसक्ने देखिन्छ । त्यसपछि उनले तुरुन्तै जोडसँग आएको हावाको झोक्का र हिमपातले उनलाई मौसमको प्राविधिक जानकारीका आधारमा मात्र उडान गर्नुपर्ने अवस्थामा पुर्याउँछ। त्यहाँको अवस्थागत जानकारी र हेलिकप्टरको नियन्त्रण उनले गुमाउँछन् र अन्ततः जमिनमा बजारिन्छ,’ दुर्घटनाको सम्भावित प्रमुख कारणबारे प्रतिवेदनमा भनिएको छ ।
सरकारले गतवर्ष यज्ञप्रसाद गौतमको अध्यक्षतामा गठन गरेको आयोगले सो प्रतिवेदन आइतबार संस्कृति, पर्यटन तथा नागरिक उड्ययन मन्त्रालयलाई बुझाएको हो । समितिमा व्रिगेडियर जनरल दीपकप्रसाद बास्तोला र अवकाशप्राप्त पाइलट कर्णेल प्रमोदकुमार लामा सदस्य थिए भने बुद्धिसागर लामिछाने सदस्य सचिव थिए ।
सो आयोगले दुर्घटना हुनुका ६ कारण बताएको छ । जसमा प्रतिकूल मौसम, अघिल्लो सिटमा क्षमताभन्दा बढी लोड र बिग्रँदो मौसमका कारण त्यहाँ रहेका व्यक्तिहरु छिटोभन्दा छिटो त्यहाँबाट निस्कने चिन्ता बताइएको छ ।
त्यसैगरी, विन्डसिल्डको बाहिरीभागमा हिउँ जमेका कारण भिजिबिलिटी कम हुनु, संस्थाको पर्याप्त संचालन निगरानीको कमी र उडानपूर्वको तयारीमा कमी तथा व्यक्तिहरुको लोड आँकलनको कमीलाई पनि दुर्घटना निम्त्याउने कारणको रुपमा लिइएको छ ।
