चितवन- नेपाल विज्ञान तथा प्रविधि प्रज्ञा प्रतिष्ठान (नास्ट) ले नेपालका विज्ञहरुको विवरण संकलन कार्यको थालनी गरेको छ ।

नेपालका सरकारी वा गैरसरकारी कार्यालयहरुमा कार्यरत तथा अन्यत्र छरिएर रहेका विज्ञान तथा प्रविधि (प्राकृतिक विज्ञान, कृषि विज्ञान, चिकित्सा शास्त्र, इन्जिनियरिङ, गणित, सूचना प्रविधि आदि) विषयहरुबाट विद्यावारिधि प्राप्त वा सो सरह नेपाली वैज्ञानिक एवं विद्यावारिधि सकेर विदेशमा रहेका नेपाली वैज्ञानिक एवं प्राविधिकहरुको यथार्थ विवरण संकलन गर्ने उद्देश्यले ‘हु इज हु इन साइन्स एन्ड टेक्नोलोजी डिरेक्टरी’ प्रकाशन गर्ने कार्यको थालनी यसै वर्षदेखि सुरु गरेको छ ।

उक्त ‘डिरेक्टरी’ प्रकाशनार्थ आवश्यक तथ्यांक संकलन गर्न नास्टले आफनो होमपेज www.nast.gov.np भित्र प्रवेश गरी ‘हु इन हु लिङ्क’ (http:/www.nast.org.np/who is who/) मार्फत फारम भर्न सकिने व्यवस्था गरेको छ ।

यसै सन्दर्भमा नास्टको उक्त कार्यक्रमलाई प्रभावकारी बनाउन र कार्यक्रमको उद्देश्यमाथि थप प्रकाश पार्न नास्टको प्रतिनिधित्व गर्दै ‘डिरेक्टरी’ प्रकाशन समितिका सदस्य एवं नास्टका वैज्ञानिक अधिकृत डा तीर्थराज घिमिरे र प्रकाशन समितिका सदस्य सचिव एवं नास्टका प्रर्वद्धन अधिकृत श्री ज्योतिप्रसाद फुयालद्वयको संयोजनमा हालै कृषि तथा वन विज्ञान विश्वविद्यालय रामपुरमा एक कार्यक्रमको आयोजना गरियो ।

कार्यक्रममा विश्वविद्यालयका उपकुलपति प्राडा शारदा थपलियाले नास्टद्वारा सुरु गरिएको ‘डिरेक्टरी’ ले राजधानीबाहिर रहेका वैज्ञानिक एवं प्राविधिकहरुमा रहेको विज्ञता चिनाउन सहयोग पुग्ने बताए । उनले प्रकाशोन्मुख ‘डिरेक्टरी’ केवल एक वर्षका लागि मात्र प्रकाशित नगरी प्रत्येक वर्ष अद्यावधि गर्न सुझाव दिए ।

सहप्राध्यापक डा. निराजन भट्टराईले प्रकाशोन्मुख ‘डिरेक्टरी’ मा वैज्ञानिक एवं प्राविधिकहरुले प्रकाशन गरेका कृतिहरुको विवरण पनि समावेश गर्दा अझ राम्रो हुने बताए ।

तपाईको प्रतिक्रिया