–नारायण अधिकारी
चितवन । कोरोना भाइरसको सङ्क्रमणबाट जोगिन चितवन जिल्लाका सातवटै स्थानीय तह पूर्वतयारीमा लागेका छन् । जिल्लाका एक महानगर, पाँच नगरपालिका र एक गाउँपालिकाले कोरोना विशेष अस्थायी अस्पतालदेखि गाउँघरमा सचेतना जगाउनेसम्मको काममा सक्रियता देखाएका छन् ।

जिल्लाको सदरमुकाममा रहेको भरतपुर महानगरपालिकाले यहाँको प्रदर्शनी केन्द्रमा ७० श्ययाको अलग्गै कोरोना अस्पताल स्थापना गरी काम अगाडि बढाएको छ ।

भरतपुर महानगरपालिका प्रमुख रेनु दाहालका अनुसार भरतपुरको सरकारी, निजी र मेडिकल कलेजमा ज्वरोका बिरामीमात्रै जाँच गर्न बेग्लै व्यवस्था गरिएको छ ।

भरतपुर अस्पतालमा आइसोलेसन वार्ड, दुई मेडिकल कलेजमा विशेष जाँच र आइसोलेसनको व्यवस्था, निजी अन्य अस्पतालमा ज्वरोका बिरामीलाई जाँच गर्ने, आइसोलेसनमा राख्नुपर्ने भएमा त्यही राख्नु पर्ने, थप शङ्का लागेमा मात्र कोरोना अस्पतालमा पठाउने गरी व्यवस्था मिलाइएको प्रमुख दाहालले जानकारी दिइन् ।

“महानगरपालिकाभित्र स्वास्थ्य सचेतनाको लागि काम गरेका छौँ”, उनले भनिन्, “मानिसको भीड हुने स्थान बन्द गराएका छौँ । अन्य स्थानमा सचेतना जगाउने र स्वस्थ व्यवहार गर्नका लागि व्यवस्था गरिएको छ ।”

यस्तै, रत्ननगर नगरपालिकाका प्रमुख नारायण वनका अनुसार त्यहाँको गुञ्जमान अस्पतालमा २० र रत्ननगर अस्पतालमा तीन श्ययाको आइसोलेसनको व्यवस्था गरिएको छ । नगरपालिकाको हरेक वडामा स्वास्थ्य सचेतना कार्यक्रम सञ्चालन गरिएको छ ।

भीड हुने स्थान बन्द गराइएको छ । शङ्का लागेका व्यक्तिलाई स्वास्थ्य जाँच गराउन हेल्थ डेस्क स्थापना गरिएको छ ।

खैरहनी नगरपालिका प्रमुख लालमणि चौधरीले कोरोना भाइरस सङ्क्रमण रोक्न आवश्यक सतर्कता अपनाउने काम भएको बताए । नगरवासीलाई साबुन पानीले हात धोएरमात्र खाने सामग्री प्रयोग गर्न, भेटघाट कम गर्न, घरमा नै बस्नलाई सूचित गरेको, उच्च ज्वरोका बिरामीलाई भरतपुरको अस्पतालमा जान सचेतना जारी गरिएको छ ।

राप्ती नगरपालिका प्रमुख प्रभा बरालका अनुसार भण्डारा अस्पतालमा तीन शैय्याको आइसोलेसनको व्यवस्था गर्ने गरी तयारी भएको छ । ठूला अस्पताल नभएको र मानिसको भीड कम हुने भएकाले यहाँ अलगै राखिने गरी व्यवस्था नभएको जानकारी दिए । नगरवासीलाई स्वस्थ व्यवहार गर्न सचेतना जगाइएको उनले बताए ।

कालिका नगरपालिकामा रहेको जुटपानी प्राथमिक स्थास्थ्य केन्द्रमा आइसोलेसनको व्यवस्था गर्न ठाउँ तयारी अवस्थामा रहेको छ ।

नगरपालिकाको वडा कार्यालयमा अत्यावश्यक काम बाहेक अन्य सेवा बन्द गरिएको छ । माडी नगरपालिकाका प्रमुख ठाकुर ढकालले माडीमा भारतसँग सीमा जोडिएको ठोरी नाकाबाट नेपाल भित्रन रोक लगाइएको बताए । नेपाली नागरिक भए उनीहरुलाई सुरक्षित तरिकाले ल्याएर विद्यालयको अलग्गै कोठामा राख्ने तयारी गरिएको छ । सवारी साधनलाई भने ठोरी माडी चल्नमा रोक लगाइएको छ ।

जिल्लाको एकमात्र गाउँपालिका इच्छाकामनाका प्रमुख गीता गुरुङका अनुसार मानिसको अत्यधिक भीड हुने ठाउँ भएरकाले कुरिनटारबाट मनकामना जाने केबलकार बन्द गरिएको छ । विरामीलाई उपचार गर्न यहाँको स्वास्थ्य केन्द्र र निजी अस्पतालमा व्यवस्था मिलाइएको छ । शङ्का लागेका व्यक्तिलाई भरतपुर पठाउने व्यवस्था मिलाएको उनले जानकारी दिए ।

रोगको सङ्क्रमणबाट बच्न दैनिक बैठक बसेर उपायहरु अपनाइ राखेको प्रमुख जिल्ला अधिकारी नारायणप्रसाद भट्टराईले जानकारी दिए ।

जिल्लाका अस्पतालले आफ्नो सेवा दिनुपर्ने, आवश्यक चिकित्सकको सम्पर्क नम्बर सार्वजनिक गर्ने, दैनिक भएका घटनाको विषयमा हरेक दिन सूचना जारी गर्ने गरी तयारी भइराखेको उनले बताए । उनका अनुसार जिल्लाका सबै स्थानीय तहमा थप क्वारेन्टाइन निर्माण गर्न आग्रह गरिएको छ । त्यसको लागि स्थानीय तहले ठाउँ खोजी र व्यवस्थापनको काम भइरहेको जनाएका छन् । रासस

तपाईको प्रतिक्रिया