काठमाडौँ । नेपालमा पछिल्लो २४ घन्टाभित्र थप १०८१ जनामा कोरोना संक्रमण पुष्टि भएको छ । देशभरका ३९ वटा प्रयोगशालामा गरिएको ११ हजार १६७ जनाको पिसिआर परीक्षणका क्रममा १०८१ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

बुधबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ४९ हजार २१९ पुगेको छ । जसमा १५ हजार २५ जना सक्रिय संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ५० भन्दा बढी जिल्लामा निषेधाज्ञा जारी गरिएको छ ।
काठमाडौं उपत्यकाका थप ४६४ जनामा संक्रमित थपिएका छन् । काठमाडौँका ३९४, ललितपुरका ३४ र भक्तपुरका ३६ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । हालसम्म उपत्यकाभित्र संक्रमित हुनेको संख्या ९४४० पुगेको छ । जसमा काठमाडौँमा कुल ७६११, ललितपुरमा १०११ र भक्तपुरमा ८१८ जना रहेका छन् ।

मन्त्रालयका अनुसार चितवन, काठमाडौँ, ललितपुर, भक्तपुर, मोरङ, सुनसरी, झापा, मकवानपुर, धनुषा, पर्सा, रौतहट, महोत्तरी, सप्तरी, सर्लाही, बारा, डोटी, बाजुरा, कैलाली, कन्चनपुर, पाल्पा, पश्चिम नवलपरासी, दाङ, बाँके, दैलेख, अछाम र रुपन्देहीमा ५०० भन्दा बढी संक्रमित रहेका छन् । सोलुखुम्बु, मुस्ताङ, ताप्लेजुङ, डोल्पा र हुम्लामा संक्रमितको संख्या शून्य छ ।

प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट ६ जनाको मृत्यु भएको जानकारी दिए । योसँगै नेपालमा कोरोना भाइरसको संक्रमणबाट मृत्यु हुनेको संख्या ३१२ पुगेको छ ।
त्यस्तै, बुधबार एकैदिन कोरोना संक्रमण निको भई ९१८ जना डिस्चार्ज भएका छन् । हालसम्म डिस्चार्ज हुनेको संख्या ३३ हजार ८८२ पुगेको छ । जुन कुल संक्रमितको ६८.८४ प्रतिशत हो ।
प्रवक्ता डा गौतमका अनुसार हालसम्म ७ लाख ९९ हजार ३४१ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ५ हजार ४८० जना क्वारेन्टाइनमा र १५ हजार २५ जना आइसोलेसनमा रहेका छन् ।
जसमा संस्थागत आइसोलेसनमा ७ हजार ९८८ जना र होम आइसोसनमा ७ हजार ३७ जना रहेका छन् । जसमध्ये २२ जनाको भेन्टिलेटरमा र १६२ जनाको आइसियूमा उपचार भइरहेको छ ।

तपाईको प्रतिक्रिया