काठमाडौँ । नेपालमा पछिल्लो २४ घन्टाभित्र थप १४५९ जनामा कोरोना संक्रमण पुष्टि भएको छ । देशभरका ३९ वटा प्रयोगशालामा गरिएको १० हजार ३७५ जनाको पिसिआर परीक्षणका क्रममा १४५९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मंगलबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ५६ हजार ७८८ पुगेको छ । जसमा १५ हजार ७७९ जना सक्रिय संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ५० भन्दा बढी जिल्लामा निषेधाज्ञा जारी गरिएको छ ।

काठमाडौँ उपत्यकामा थप ६७६ जनामा संक्रमित थपिएका छन् । काठमाडौँका ५५५, ललितपुरका ८६ र भक्तपुरका ३५ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । हालसम्म उपत्यकाभित्र संक्रमित हुनेको संख्या १२ हजार ९२४ पुगेको छ । जसमा काठमाडौँमा कुल १० हजार ९८, ललितपुरमा १ हजार ३३९ र भक्तपुरमा १ हजार ४ जना रहेका छन् ।

प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट ११ जनाको मृत्यु भएको जानकारी दिए । यससँगै नेपालमा कोरोना सङ्क्रमणबाट ज्यान गुमाउनेको सङ्ख्या ३७१ पुगेको छ ।

त्यस्तै, मंगलबार एकैदिन कोरोना संक्रमण निको भई १०६२ जना डिस्चार्ज भएका छन् । हालसम्म डिस्चार्ज हुनेको संख्या ४० हजार ६३८ पुगेको छ । जुन कुल संक्रमितको ७१.५५ प्रतिशत हो ।

प्रवक्ता डा गौतमका अनुसार हालसम्म ८ लाख ६१ हजार ७८० जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ७ हजार २५० जना क्वारेन्टाइनमा र १५ हजार ७७९ जना आइसोलेसनमा रहेका छन् ।

जसमा संस्थागत आइसोलेसनमा ८ हजार १३९ जना र होम आइसोलेसनमा ७ हजार ६४० जना रहेका छन् । जसमध्ये २८ जनाको भेन्टिलेटरमा र १७४ जनाको आइसियूमा उपचार भइरहेको छ ।

तपाईको प्रतिक्रिया