नयाँ दिल्ली । भारतमा कोरोना भाइरसका नयाँ संक्रमितहरु थपिएका शनिबार जनाइएको छ । गएको २४ घन्टायता यहाँ १ हजार ३५ जना नयाँ संक्रमित थपिएको बताइएको हो । शनिबार बिहानको तथ्यांकअनुसार भारतमा ‘कोभिड १९’ का संक्रमितहरुको संख्या ७ हजार नाघिसकेको छ । प्राप्त समाचारअनुसार यहाँ शनिबार बिहानसम्म ७ हजार ४४७ जनामा यसको संक्रमण भएको भारतीय स्वास्थ्य तथा परिवार कल्याण मन्त्रालयले जानकारी दिएको छ ।
भारतको मध्यप्रदेशस्थित इन्दौरमा कोरोना भाइरस संक्रमणबाट एक डाक्टरको समेत मृत्यु भएको छ । तीन दिनअघि कोरोना भाइरसको संक्रमण पुष्टि भएका फिजिसियन डा ओमप्रकाश चौहानको मृत्यु भएको भारतीय म्यागाजिन आउटलूकले बताएको छ ।
एक निजी क्लिनिक चलाउँदै आएका डा चौहानलाई तीन दिनअघि भाइरसको संक्रमण देखिएपछि औरोबिन्दो हस्पिटलमा भेन्टिलेटरमा राखी उपचार गरिएको थियो । भारतमा बिहीबार पनि इन्दौरमै शुत्रुघ्न पंजवनी नाम गरेका अर्का एक चिकित्सकको कोरोना भाइरसको कारण मृत्यु भएको थियो । यी दुवै डाक्टरको उपचार औरोबिन्दो अस्पतालमा हुँदै आएको थियो । तर, उनीहरुले भने कोभिड–१९ का बिरामीको उपचार भने गरेका थिएनन् ।
अहिले भारतको स्थानीय प्रशासनले भने पंजावनी र चौहानको क्लिनिकमा पछिल्लो १४ दिनयता आउने मानिसहरुको खोजी गरिरहेको छ । उनीहरुको माध्यमबाट क्लिनिकमा आउनेमा कोभिड–१९ को संक्रमण फैलिएको हुनसक्ने प्रशासनले बताएको छ ।
भारतमा पछिल्लो समय कोरोना भाइरसको महामारी बढ्दो क्रममा छ । मध्यप्रदेशमा बिहीबारसम्म संक्रमितको संख्या दुई सय ५९ पुगिसकेको छ भने १६ जनाको मृत्यु भइसकेको छ ।
पछिल्ला केही दिनमा कोभिड १९ का संक्रमितहरुको संख्या बढ्दै गएको छ । भारतमा सुरुवातदेखि नै सबैभन्दा बढी संक्रमित महाराष्ट्र राज्यमा देखिएका छन् । यो क्रम शनिबारसम्म पनि जारी नै रहेको भारतीय स्वास्थ्य तथा परिवार कल्याण मन्त्रालयले जनाएको छ ।
मन्त्रालयले दिएको जानकारीअनुसार यहाँ गएको २४ घन्टा यता मृत्यु हुनेको संख्या पनि अहिलेसम्मकै सबैभन्दा धेरै पाइएको छ । गएको २४ घन्टामा यहाँ ४० जनाको ज्यान गएको सो मन्त्रालयको तथ्यांकमा उल्लेख गरिएको छ । योसँगै भारतमा कोरोना संक्रमणबाट ज्यान जानेको संख्या २४९ पुगेको भारतका स्वास्थ्य अधिकारीहरुले जानकारी दिएका छन् ।
महाराष्ट्रमा कोभिड १९ का संक्रमितहरु दिन प्रतिदिन बढ्दै गएको देखिएको छ । महाराष्ट्र राज्यमा मात्र संक्रमितहरुको संख्या १ हजार ५७४ जना पुगेको शनिबार बिहान प्राप्त समाचारमा जनाइएको छ । महाराष्ट्रमा मात्र ११० जनाको ज्यान गएको बताइएको छ । यहाँका १८८ जना उपचारपछि घर फर्किएका छन् ।
महाराष्ट्रपछि सबैभन्दा बढी विरामी तालिनाडूमा छन् । तामिलनाडूमा कोरोना संक्रमण भएका व्यक्तिको संख्या शनिबार बिहानसम्म ९११ पुगेको छ । यीमध्ये २५ जना उपचारपछि घर फर्किएकाछन् । यस राज्यमा मात्र गएको २४ घन्टायता १३ जनाको ज्यान गएको छ ।
त्यसपछिका बढी संक्रमित नयाँ दिल्लीमा छन् । नयाँ दिल्लीमा यसका संक्रमितको संख्या ९३० रहेको छ । भारतमा यसरी दिन प्रतिदिन नयाँ नयाँ संक्रमितहरु थपिँदै जानु चुनौतीपूर्ण भएको यहाँका स्वास्थ्य अधिकारीहरुले जनाएका छन् । एएनआई

तपाईको प्रतिक्रिया