बेइजिङ । भारतले टिकटकसहित ५९ वटा चिनियाँ एप्समाथि प्रतिबन्ध लगाएपछि चीनले आफ्नो गम्भीर ध्यानाकर्षण भएको जनाएको छ ।

चिनियाँ विदेश मन्त्रालयका प्रवक्ता झाओ लिचियानले भने, “चिनियाँ एपमाथि भारतद्वारा गरिएको प्रतिबन्धप्रति चीन गम्भीर चासो व्यक्त गर्दछ । हामीले यो कुरामा जोड दिन चाहन्छौँ कि चीन सधैँ आफ्ना व्यवसायीलाई अन्तर्राष्ट्रिय तथा स्थानीय कानुनको पालना गर्न आग्रह गर्दै आएको छ र भारतले पनि चिनियाँलगायत अन्तर्राष्ट्रिय लगानीकर्ताको कानुनी अधिकारको संरक्षण गर्ने जिम्मेवारी रहन्छ ।”

उनले चिनियाँ कम्पनीलाई स्थानीय र अन्तर्राष्ट्रिय कानुनअनुसार चल्न निर्देशन दिँदै आएको बताउँदै भारतले गैर–जिम्मेवारपूर्ण काम गरेको संकेत गरेका छन् ।

विश्वका उदीयमान अर्थतन्त्रका रूपमा हेरिने चीन र भारतबीच सीमावर्ती क्षेत्रमा केही साता पहिले तनाव देखिएको थियो । यद्यपि त्यस क्षेत्रमा अहिले तनाव नियन्त्रणमा आएको दुवै देशका अधिकारीहरूले बताउँदै आएका छन् ।

चीनले भारतीय सेना अनधिकृतरुपमा आफ्नो भूमिमा प्रवेश गरेकाले कारबाही गर्नुपरेको बताउँदै आएको छ । त्यस्तै भारतीय पक्षले चीनको दाबीलाई खण्डन गर्दै आएको छ । एएनआई

तपाईको प्रतिक्रिया